Card image cap

ADNSU-nun keçirdiyi onlayn Məzun-Karyera sərgisinə 37 dövlət qurumu və özəl şirkət qoşulub

İyunun 11-də Azərbaycan Dövlət Neft və Sənaye Universitetində (ADNSU) yuxarı kurs tələbələri və məzunlar üçün VIII Məzun-Karyera Sərgisi keçirilib. Qlobal koronavirus pandemiyası ilə mübarizə məqsədilə Azərbaycan Respublikasında elan edilmiş karantin rejimi şəraitində onlayn formatda baş tutan sərgidə 37 dövlət qurumu və özəl şirkət tərəfindən 217 vakant iş yeri təqdim olunub. Azərbaycan Respublikasının Təhsil və Energetika nazirlərinin müavinlərinin iştirakı ilə keçirilən onlayn təqdimatda salamlama nitqi ilə çıxış edən ADNSU-nun rektoru, professor Mustafa Babanlı dövlət və şirkət nümayəndələrinə təşəkkürünü bildirib. ADNSU-da müasir sənaye və iqtisadiyyatın tələbələrinə uyğun kadrların yetişdirildiyini söyləyən rektor M.Babanlı universitetdə ənənəvi olaraq keçirilən Məzun-Karyerə sərgilərinin gənc mütəxəssilərin birbaşa şirkət nümayəndələri ilə təmas qurmasında və işlə təmin olunmasında mühün rol oynadığını vurğuilayıb.

Təhsil nazirinin müavini İdris İsayev bu sərginin əvvəlkilər kimi tələbə və məzunlar üçün faydalı olacağına əminliyini ifadə edərək ali təhsil müəssisələrinin birinci dərəcəli vəzifəsinin əmək bazarının tez-tez dəyişən tələblərinə cavab verən kadrların hazırlanması olduğunu vurğulayıb. İşəgötürənlərin daha hazırlıqlı və bilikli mütəxəsislərə üstünlük verdiklərini, təhsilsiz əmək bazarında uğur qazanılmasının mümkünsüzlüyünü qeyd edən İdris İsayev ADNSU-nun tələbə və məzunlarına və sərgiyə qatılan qurumlara uğurlar arzulayıb. Tədbirdə Azərbaycan Respublikası Energetika nazirliyinin şöbə müdiri Əsəd İsmayılov, “Azərişıq” ASC-nin Tədris və İnnovasiya Mərkəzinin direktoru Araz Məmmədzadə, “AzerGold” QSC-nin İnsan Resursları üzrə aparıcı mütəxəssisi Valid Əliyev ADNSU ilə uzunmüddətli uğurlu əməkdaşlıq, tələbələrin istehsalat prosesində iştirakı və təmsil etdikləri qurumların kadr potensialında Azİİ məzunlarının ümumi çəkisi barədə məlumat verib, bu kimi sərgilərin keçirilməsinin ali məktəblərlə yanaşı müəssisələrin də maraqlarına uyğun olduğunu qeyd ediblər.

Tədbir çərçivəsində ADNSU-nun rektoru, professor M.Babanlı ilə Socar-STP birgə müəssisəsinin baş icraçı direktoru Fərid Ağayev iki qurum arasında əməkdaşlığa dair müqavilə imzalayıblar. Rektor M.Babanlı imzalanmış sənədin ADNSU tələbələrinin bu müəssisədə geniş tərkibdə təcrübə, o cümlədən ödənişli təcrübə keçmələrində, eləcə də gələcəkdə işlə təmin olunmalarında mühüm rol oynayacağını vurğulayıb.

Sonra tədbir çərçivəsində career.asoiu.edu.az saytının təqdimatı olub. Bildirilib ki, tələbə və məzunlar career.asoiu.edu.az linki vasitəsilə sayta daxil olub vakant yerlərlə tanış ola, müvafiq şirkət və daha sonra vəzifəni seçib CV-lərini göndərə bilər. Daimi olaraq tələbələri yeni iş yerləri və vakansiyalar barədə məlumatlandıracaq saytda bu sərginin nəticələrinin iyunun 25-də açıqlanacağı elan olunub.

Tədbirin sonunda ADNSU-nun rektoru, professor Mustafa Babanlı qlobal koronavirus pandemiyası ilə mübarizə məqsdilə elan olunmuş karantin şəraitində Məzun-Karyera sərgisində iştirak etdiklərinə görə hamıya təşəkkürünü ifadə edib.